Gjashtë startup-e shqiptare do të prezantojnë projektet dhe zgjidhjet e tyre përpara sipërmarrësve, investitorëve dhe profesionistëve të diasporës shqiptare në Gjermani, në një aktivitet që do të zhvillohet më 23 nëntor 2026 në Düsseldorf.
Takimi organizohet nga GERMIN dhe Unioni i Bizneseve Shqiptaro-Gjermane në Gjermani, me mbështetjen e GIZ/EU4Innovation dhe në partneritet me Startup Albania. Qëllimi është të krijohen mundësi të reja bashkëpunimi, investimi dhe hyrjeje në tregun gjerman për sipërmarrjet shqiptare.
Në aktivitet do të prezantohen gjashtë projekte nga fusha të ndryshme të teknologjisë dhe inovacionit.
Bëhet fjalë për Coastify, një platformë që synon të lidhë bizneset dhe vizitorët në bregdetin shqiptar; THE NOT FIT, një sistem digjital për menaxhimin e palestrave; SENTRIS, një platformë për analizën dhe menaxhimin e rreziqeve si përmbytjet dhe zjarret; Tidda, e fokusuar te shëndetësia digjitale dhe inteligjenca artificiale; Qherence, që zhvillon zgjidhje për sigurinë kibernetike; si dhe NextInnovate, një platformë që ndihmon organizatat të gjejnë financime dhe të menaxhojnë projekte përmes inteligjencës artificiale.
Në delegacionin shqiptar do të jetë edhe Arjan Ymeri, drejtor i Innovation4Albania, së bashku me përfaqësues të GIZ/EU4Innovation dhe GERMIN.
Programi do të nisë me një takim mirëseardhjeje, ndërsa më pas do të prezantohet ekosistemi i inovacionit në Shqipëri dhe mundësitë e bashkëpunimit me bizneset shqiptare në Gjermani. Secili startup do të ketë gjashtë minuta për prezantimin e projektit dhe katër minuta për pyetje e përgjigje.
Pjesa përmbyllëse do t’i kushtohet rrjetëzimit dhe takimeve të drejtpërdrejta mes themeluesve, investitorëve, sipërmarrësve të diasporës dhe partnerëve të mundshëm.
Aktiviteti do të zhvillohet nga ora 18:00 deri në 21:00, në Wirtschaftsclub Düsseldorf, në adresën Blumenstraße 14, 40212 Düsseldorf.
Pas përfundimit të takimit, GERMIN do të koordinojë kontaktet e mëtejshme mes themeluesve dhe personave të interesuar, në bashkëpunim me rrjetin e Unionit të Bizneseve Shqiptaro-Gjermane.

