Sonda Voyager 1 e NASA-s besohet se ka arritur një moment historik për sa i përket distancës nga Toka, një rekord që asnjë mjet tjetër hapësinor i krijuar nga njeriu nuk e ka shënuar më parë.
Ky vlerësim bazohet në llogaritjet paraprake të agjencisë hapësinore amerikane, ndërsa sonda vijon udhëtimin e saj përmes hapësirës ndëryjore, një hapësirë pothuajse krejtësisht të zbrazët.
Sipas përllogaritjeve të NASA-s, sonda robotike, e lëshuar në vitin 1977, ka arritur distancën e një “dite-dritë” nga Toka. Kjo është largësia që drita përshkon në 24 orë, ose rreth 26 miliardë kilometra.
Voyager 1, objekti më i largët i krijuar nga njeriu, udhëton me një shpejtësi prej rreth 61 mijë kilometrash në orë. Në vitin 2012, ajo kaloi kufirin e jashtëm të heliosferës, një flluskë mbrojtëse e përbërë nga grimca dhe fusha magnetike të krijuara nga Dielli, duke hyrë kështu në hapësirën ndëryjore.
Binjakja e saj, Voyager 2, u lëshua gjithashtu në vitin 1977 dhe hyri në hapësirën ndëryjore në vitin 2018. Të dyja sondat kanë ende energji të mjaftueshme për të komunikuar me Tokën edhe për tre deri në katër vite të tjera.
