Elsa Lila po rikthen historinë e saj personale në një tjetër format, këtë herë përmes një videolibri audioviziv të bazuar në veprën autobiografike “Mirë se erdhe në Rebibbia”.
Pas botimit të librit, këngëtarja dhe autorja ka vendosur ta sjellë rrëfimin edhe përmes imazhit dhe zërit të saj. Videolibri është i interpretuar dhe rrëfyer nga vetë Elsa Lila, duke i dhënë historisë një dimension edhe më personal dhe emocional.
Publikimi do të bëhet në kanalin e saj zyrtar në YouTube, duke nisur që nesër, në orën 18:30. Përmes këtij projekti, publiku do të ketë mundësinë ta ndjekë historinë e Elsës jo vetëm përmes faqeve të librit, por edhe drejtpërdrejt nga zëri i saj.
Projekti është realizuar në bashkëpunim me Ministrinë e Kulturës, Albcult, Papadhimitri Productions dhe Renis Gjoka, duke sjellë në ekran një histori të jetuar dhe të rrëfyer nga vetë protagonistja.
