Vetëm pak javë pasi ndau me publikun lajmin e bukur se është në pritje të fëmijës së dytë, moderatorja Sara Gjordeni ka zhvilluar një bashkëbisedim me ndjekësit e saj në Instagram, ku iu përgjigj pyetjeve rreth shtatzënisë.
Një nga pyetjet që tërhoqi më shumë vëmendje ishte nëse ajo dhe Bardhi do të organizojnë një “gender reveal” për të zbuluar gjininë e bebit. Sara zbuloi se, ashtu si në pritjen e vajzës së tyre Nea, edhe këtë herë kanë zgjedhur ta përjetojnë këtë moment vetëm mes tyre, në mënyrë intime dhe larg vëmendjes publike.
Me humor, moderatorja tha se sot ka plot mënyra spektakolare për të bërë një “gender reveal”, madje edhe me avionë që lëshojnë tym me ngjyra, por theksoi se ata preferojnë ta mbajnë këtë moment të thjeshtë dhe familjar.
Arsyeja e këtij vendimi është tepër domethënëse. Sara shpjegoi se nuk dëshiron të krijojë asnjë dallim mes fëmijëve të saj dhe që, kur Nea të rritet, të mos ndihet më pak e veçantë vetëm sepse për fëmijën e dytë mund të ishte organizuar një festë më e madhe.
“Nuk dua absolutisht diferencime mes fëmijëve. Edhe 10 të kemi, të gjithëve do ua bëjmë njësoj,” u shpreh ajo, duke shtuar se momentin e zbulimit të gjinisë do ta ndajnë me ndjekësit vetëm pasi ta kenë përjetuar fillimisht si familje.
