Besnik Qaka ka ndarë disa detaje nga një prej eventeve më të komentuara të momentit, dasma private e këngëtares me famë botërore, Dua Lipa. I ftuar në emisionin “Kampionët e Botës” në Tv Klan, lideri i NRG Band foli shkurt, por me shumë modesti, për eksperiencën e tij në këtë ngjarje të veçantë.
Gjatë bisedës, moderatorja Marina Vjollca e krahasoi atë me Lionel Messin për modestinë që e karakterizon, duke theksuar se pavarësisht suksesit të madh në muzikë, Qaka ka zgjedhur gjithmonë të flasë pak dhe të lërë projektet e tij të flasin vetë.
Së fundmi, këngëtari ishte pjesë e dasmës private të Dua Lipës dhe aktorit Callum Turner, ku performoi për rreth një orë para të ftuarve. I pyetur për emocionet e atij momenti, ai u shpreh se gjithçka kishte qenë e jashtëzakonshme.
“Super, super! Jemi kënaqur, ka qenë një dasmë gjigante. Kemi performuar para njerëzve më të rëndësishëm!”, tha Qaka.
Sipas tij, atmosfera ka qenë fantastike, ndërsa të ftuarit kanë kënduar dhe kërcyer nën ritmet e muzikës shqiptare. Edhe pse nuk zbuloi shumë detaje nga ceremonia, artisti la të kuptohet se ishte një eksperiencë që do ta mbajë mend gjatë.
Pjesëmarrja e Besnik Qakës në një nga ditët më të rëndësishme të jetës së Dua Lipës është parë si një tjetër vlerësim për muzikën shqiptare, e cila po gjen gjithnjë e më shumë vend në skenat dhe eventet ndërkombëtare.