Jo të gjithë njerëzit e shprehin dashurinë në të njëjtën mënyrë. Disa tregojnë kujdes me fjalë të ëmbla, të tjerë me përqafime, surpriza apo gjeste të vogla të përditshme. Pikërisht këtë ide shpjegon teoria e famshme e “5 gjuhëve të dashurisë”, e krijuar nga këshilluesi i marrëdhënieve Gary Chapman në vitin 1992.
Sipas kësaj teorie, njerëzit kanë mënyra të ndryshme për të dhënë dhe për të marrë dashuri. Ekspertët thonë se kuptimi i “gjuhës së dashurisë” së partnerit mund të ndihmojë në forcimin e marrëdhënieve dhe komunikimit emocional.
Fjalët e afirmimit
Për disa njerëz, dashuria shprehet përmes komplimenteve, mesazheve të ëmbla dhe fjalëve motivuese. Një “jam krenar për ty” apo “dukesh bukur sot” mund të ketë shumë më tepër vlerë sesa një dhuratë materiale.
Koha cilësore
Ka persona që ndihen më të dashur kur partneri kalon kohë të vërtetë me ta — pa telefon, pa shpërqendrime dhe me vëmendje të plotë. Bisedat e gjata, shëtitjet apo edhe një darkë e qetë bashkë konsiderohen shumë të rëndësishme për këtë grup.
Dhuratat
Për disa, një dhuratë e vogël simbolike është mënyra më e fortë për të treguar kujdes dhe mendim ndaj dikujt. Nuk ka të bëjë me çmimin, por me ndjesinë që personi ka menduar për ta.
Veprat e shërbimit
Ka njerëz që ndihen të dashur kur partneri i ndihmon në gjërat e përditshme — si përgatitja e kafesë, ndihma në punët e shtëpisë apo kujdesi gjatë një dite të lodhshme. Për ta, veprimet vlejnë më shumë sesa fjalët.
Kontakti fizik
Përqafimet, mbajtja e duarve apo një puthje e thjeshtë janë mënyra kryesore si disa njerëz ndihen emocionalisht të lidhur me partnerin. Ekspertët thonë se kontakti fizik mund të ndihmojë edhe në uljen e stresit dhe rritjen e ndjenjës së sigurisë në çift.
Megjithatë, psikologët theksojnë se teoria e “love languages” nuk është një formulë perfekte për çdo marrëdhënie. Disa ekspertë besojnë se njerëzit nuk mund të futen vetëm në një kategori dhe se mënyrat si japim apo marrim dashuri mund të ndryshojnë me kohën dhe eksperiencat personale.
Pavarësisht debateve, koncepti është bërë shumë popullor në rrjetet sociale dhe mes çifteve, sepse i ndihmon njerëzit të kuptojnë më mirë nevojat emocionale të partnerit dhe mënyrën si ndihen më të vlerësuar në një lidhje.