Gjithnjë e më shumë të rinj në Europë po përdorin chatbot-et me inteligjencë artificiale jo vetëm për informacion apo argëtim, por edhe për të folur rreth problemeve personale dhe emocionale. Një sondazh i ri ka treguar se pothuajse një në dy të rinj ndihen rehat të ndajnë shqetësimet e tyre me AI, duke e konsideruar atë si një “shok të besuar”.
Studimi, i realizuar nga Ipsos BVA në Francë, Gjermani, Suedi dhe Irlandë, përfshiu rreth 3,800 persona të moshës 11 deri në 25 vjeç. Sipas rezultateve, 51% e të anketuarve thanë se e kanë të lehtë të flasin për shëndetin mendor dhe problemet personale me chatbot-et, ndërsa vetëm 49% thanë të njëjtën gjë për profesionistët e shëndetit dhe 37% për psikologët.
Megjithatë, njerëzit më të afërt mbeten ende burimi kryesor i mbështetjes emocionale. Rreth 68% e të rinjve thanë se ndihen më rehat të flasin me miqtë, ndërsa 61% me prindërit.
Ekspertët thonë se një nga arsyet pse chatbot-et po fitojnë kaq shumë popullaritet është fakti që janë gjithmonë të disponueshëm dhe nuk gjykojnë. Mbi 90% e të rinjve të pyetur kanë përdorur më parë mjete të inteligjencës artificiale dhe shumë prej tyre i përshkruajnë si “këshilltar jete” apo “të besuar”.
Por specialistët paralajmërojnë edhe për rreziqet. Psikologët theksojnë se chatbot-et nuk mund të zëvendësojnë marrëdhëniet njerëzore apo ndihmën profesionale për shëndetin mendor. Ata shpjegojnë se inteligjenca artificiale mund të japë përgjigje bindëse, por nuk është në gjendje të kuptojë plotësisht emocionet njerëzore apo situatat komplekse psikologjike.
Sondazhi nxori në pah edhe shqetësime për gjendjen emocionale të të rinjve në Europë. Rreth 28% e pjesëmarrësve rezultuan me shenja që lidhen me çrregullimin e ankthit të përgjithësuar.
Ndërkohë, studime të tjera tregojnë se disa adoleshentë po krijojnë edhe lidhje emocionale me chatbot-et. Në Itali, një raport tregoi se katër në dhjetë të rinj pranuan se kishin zhvilluar një lloj lidhjeje emocionale me inteligjencën artificiale.
Ekspertët këmbëngulin se teknologjia mund të jetë një ndihmë e përkohshme për informacion apo mbështetje bazike, por nuk duhet të zëvendësojë komunikimin real me familjen, miqtë apo profesionistët e shëndetit mendor.