Manikyri me xhel është bërë një nga zgjedhjet më të preferuara për shkak të pamjes elegante dhe qëndrueshmërisë, por përdorimi i shpeshtë mund të sjellë edhe disa probleme për thonjtë dhe lëkurën. Ekspertët paralajmërojnë se ekspozimi i përsëritur ndaj llambave UV/LED dhe produkteve kimike të përdorura gjatë procesit mund të shkaktojë dëmtime, veçanërisht nëse procedura nuk kryhet në mënyrë korrekte.
Një tjetër shqetësim lidhet me dobësimin dhe brishtësinë e thonjve. Heqja e xhelit duke e gërryer ose shqyer mund të dëmtojë sipërfaqen e thoit dhe ta bëjë atë më të hollë. Për këtë arsye, specialistët këshillojnë që produkti të hiqet në mënyrë profesionale dhe të mos përdoren mjete të forta në shtëpi.
Ekspertët rekomandojnë gjithashtu t’u kushtohet vëmendje ndryshimeve në thonj apo në lëkurën përreth tyre. Skuqja, kruajtja, dhimbja ose ndryshimet e pazakonta mund të jenë shenja irritimi ose alergjie dhe nuk duhet të neglizhohen.