Nga vajza shqiptare që nisi karrierën duke publikuar cover në YouTube, në një nga emrat më të mëdhenj të muzikës pop botërore, Dua Lipa vazhdon të dominojë industrinë muzikore ndërkombëtare.
Së fundmi, artistja ka surprizuar fansat me publikimin e filmit koncert “Dua Lipa: Live From Mexico”, një performancë gati dy-orëshe nga turneu i saj botëror, që tashmë është bërë viral në YouTube dhe po merr miliona klikime brenda pak ditësh.
Filmi koncert sjell momentet më të forta nga performanca e saj në Mexico City, ku Dua interpreton hitet më të mëdha të karrierës si “Levitating”, “Houdini”, “Training Season”, “New Rules” dhe shumë këngë të tjera që kanë dominuar toplistat globale.
Fansat kanë vlerësuar jo vetëm performancën live të artistes, por edhe skenografinë spektakolare, energjinë në skenë dhe produksionin vizual të koncertit. Në rrjetet sociale, shumë përdorues po e quajnë projektin një nga filmat koncert më të mirë pop të viteve të fundit.
Turneu i Dua Lipës konsiderohet një nga më të suksesshmit e momentit, me stadiume të mbushura në disa vende të botës dhe kërkesë të lartë për bileta. Artistja ka marrë vlerësime edhe për performancat live dhe praninë e saj skenike, që prej kohësh konsiderohen pika të forta të karrierës së saj.
Publikimi i filmit në YouTube shihet edhe si një mënyrë për t’i afruar më shumë fansat që nuk patën mundësi ta ndjekin koncertin live. Projekti po shpërndahet masivisht online dhe po merr reagime shumë pozitive nga publiku ndërkombëtar.
Nga cover-at e parë në internet deri te skenat më të mëdha të botës, Dua Lipa vazhdon të jetë një nga artistet më të suksesshme shqiptare në arenën globale.