Një zbulim i jashtëzakonshëm ka habitur botën e shkencës: paleontologët në jug të Francës kanë gjetur mbi 100 vezë dinosaurësh të fosilizuara, që mendohet se janë rreth 72 milionë vite të vjetra. Zbulimi u bë në zonën e Mèze, pranë muzeut “Musée Parc des Dinosaures”, një nga zonat më të njohura paleontologjike në Europë.
Sipas ekspertëve, vezët janë afërsisht sa madhësia e një pjepri të vogël dhe besohet se i përkisnin titanosaursëve — dinosaurë gjigantë barngrënës që arrinin deri në 15 metra gjatësi dhe peshonin dhjetëra tonë.
Zbulimi u bë nga gjeologu dhe paleontologu Alain Cabot, themelues i muzeut të dinosaurëve në Mèze. Ai deklaroi se zona mund të fshehë edhe qindra vezë të tjera nën tokë dhe e quajti vendin “një depozitë të jashtëzakonshme” që do të studiohet për breza të tërë.
Shkencëtarët mendojnë se miliona vite më parë kjo zonë ishte pjesë e një ishulli të madh prehistorik që përfshinte jugun e Francës, Spanjën dhe Portugalinë. Dinosaurët riktheheshin çdo vit në të njëjtin vend për të lëshuar vezët, një sjellje që ngjan me mënyrën si veprojnë sot disa zogj dhe breshka.
Sipas studiuesve, përmbytjet dhe shtresat e sedimentit ndihmuan në ruajtjen e vezëve për miliona vite. Disa prej tyre janë ruajtur në gjendje shumë të mirë dhe mund të japin informacione të rëndësishme për jetën dhe klimën në periudhën e fundit të dinosaurëve.
Lajmi ka bërë xhiron e rrjeteve sociale dhe shumë përdorues po e krahasojnë zbulimin me skena nga filmat “Jurassic Park”. Ndërkohë, ekspertët theksojnë se ky është një nga zbulimet më të rëndësishme paleontologjike të viteve të fundit në Europë.