Në fakt, e vërteta qëndron te faktet, dhe faktet janë këto:
Arbana Osmani ka vijuar programin e saj në YouTube Mirëmbrëma yje, duke shënuar sezonin e dytë radhazi, ku ajo këtë emision e shfaq çdo të enjte në orën 20:00. E teksa emisionet online janë në rritje këtë sezon mediatik, edhe Grida Duma lançoi podcastin e saj çdo të diel, ku prej disa episodesh radhazi duket se ekziston një interesim i gjerë nga publiku.
Një element i pazakontë ka ndodhur së fundmi, ku në të dy këto prodhime i ftuari është i njëjtë dhe bëhet fjalë pikërisht për Elsa Lilën. Por nuk do të mjaftonte vetëm kjo, pasi menjëherë sapo Arbana njoftoi ditën e mërkurë të ftuarin e episodit të radhës, Grida postoi në rrjetet sociale gjithashtu njoftimin e episodit të saj të radhës, por këtë herë me një ndryshim: nga e diela, ku ajo e publikon zakonisht podcastin, ajo e sposton atë pikërisht të enjten në orën 18:00. Arsyeja e këtij spostimi nga Grida nuk dihet; megjithatë, komentet e shumta në rrjet dhe interpretimi i këtij veprimi lënë vend për të ngritur një pyetje:
A është rastësi apo garë mediatike për të kapur e para audiencën e koleges?!
E në fakt, duke qenë se e enjtja është “e Arbanës” tashmë prej më shumë se një viti, ajo, me shumë finesë, i përgjigjet kësaj situate duke ndryshuar premierën e episodit të radhës. Këtë herë, Mirëmbrëma yje do ta shohim paraditen e kësaj të enjteje.
