Dua Lipa po e zgjeron angazhimin e saj në promovimin e leximit me një projekt të ri kulturor. Pas suksesit të klubit të librave Service95, të krijuar në vitin 2021, artistja ka inauguruar bibliotekën e saj të parë fizike.
E quajtur Biblioteka Manifesto, hapësira u çel më 27 qershor në kuadër të festivalit ndërkombëtar të librit BABELL – City of Books dhe do të ketë një vend të përhershëm brenda Livraria Lello, një prej librarive më të njohura në Porto të Portugalisë.
Në njoftimin e saj, Dua Lipa e përshkroi këtë nismë si “një partneritet të ëndrrave”, duke theksuar se projekti është rezultat i viteve të punës për të nxitur më shumë njerëz t’i afrohen leximit.
“Kur themelova Klubin e Librit Service95, ambicia ime ishte që ai të bëhej një shtëpi për shkrimtarët dhe lexuesit, kudo që ndodhen dhe pavarësisht rrethanave të tyre. Leximi i botës na afron me njëri-tjetrin, por fatkeqësisht jo të gjithë e mbështesin këtë,” u shpreh këngëtarja.
Biblioteka do të përmbajë rreth 100 tituj, të përzgjedhur për temat dhe debatet që kanë nxitur ndër vite. Sipas artistes, shumë prej tyre janë përballur me censurë ose kufizime.
“Këtu do të gjeni njëqind libra që shtrojnë pyetje ose që janë vënë në pikëpyetje. Disa prej tyre janë ndaluar në shkolla për shkak të temave që trajtojnë, si raca apo seksualiteti. Të tjerë, të shkruar për lexuesit e komunitetit LGBTQIA+, janë kufizuar nga ekspozimi publik. Në disa raste, autorët kanë paguar me jetën për fjalët që kanë shkruar,” deklaroi ajo.
Dua Lipa ftoi gjithashtu vizitorët të krijojnë mendimin e tyre përmes leximit.
“Jeni të ftuar ta vizitoni dhe të vendosni vetë se çfarë meriton të jetë në këto rafte. Sepse ndonjëherë gjëja më subversive që mund të bësh është të lexosh një libër dhe më pas të flasësh për të.”
Librat e përzgjedhur trajtojnë katër tema kryesore: pushtetin, kontrollin, zërin dhe kujtesën. Mes tyre janë vepra të njohura si “The Handmaid’s Tale” e Margaret Atwood, “Felon” e Reginald Dwayne Betts, si edhe libra të autorëve Salman Rushdie dhe Olga Tokarczuk.
Edhe drejtuesja e markës Livraria Lello, Francisca Pedro Pinto, vuri në dukje rëndësinë e këtij bashkëpunimi.
“Për 120 vite, Livraria Lello është ndërtuar mbi një bindje të thjeshtë: libri është një teknologji e lirisë. Biblioteka Manifesto lind nga kjo bindje,” tha ajo.
Më tej shtoi: “Sepse ajo që është në lojë nuk është vetëm e ardhmja e leximit, por edhe aftësia e një shoqërie për të imagjinuar, interpretuar dhe ndërtuar të ardhmen e saj.”