Soni Malaj ka ndarë emocionet e forta që përjetoi pas surprizës spektakolare që Flor Mumajesi i bëri në “Ferma VIP”, një moment që preku publikun dhe riktheu në qendër të vëmendjes raportin mes tyre.
Këngëtarja u shpreh se mbështetja e Florit ka qenë gjithmonë e rëndësishme në jetën e saj, duke vlerësuar marrëdhënien e veçantë që kanë ruajtur ndër vite, larg vëmendjes së publikut.
“Mbështetja e Florit ka pasur gjithmonë shumë vlerë për mua. Të dy jemi njerëz diskretë, nuk kemi qenë kurrë të zhurmshëm në raportin tonë. Prisja një gjest simbolik, por jo diçka kaq madhështore. Ishte një lumturi e jashtëzakonshme. Flori nuk është njeri i shumë fjalëve, ashtu si unë. Gjithmonë kemi folur më shumë me vepra sesa me fjalë”, u shpreh ajo.
Soni tregoi se mbeti pa fjalë kur pa qindra dronë të ndriçonin qiellin me portretin e saj dhe mesazhe dedikuese.
“Në fillim po shikoja qiellin dhe mendoja se moti do të prishej. Papritur nisi muzika dhe qielli u mbush me drita, sikur ishte mbuluar nga yje. Ishte një emocion shumë i madh. U ndjeva e befasuar dhe nuk po arrija të shprehja atë që ndjeja në ato momente”, rrëfeu këngëtarja.
E pyetur nëse surpriza mund të jetë një hap drejt një ribashkimi me Florin, Soni nuk dha një përgjigje të drejtpërdrejtë, por la të kuptohet se asgjë nuk përjashtohet.
“Në një marrëdhënie, hapat e mëdhenj duhet t’i hedhë mashkulli. Nga ana ime, ai i di të gjitha”, deklaroi ajo, duke lënë hapësirë për interpretim.