Emmanuel dhe Brigitte Macron padisin Candace Owens për shpifje: “Do të paraqesim prova që Brigitte është grua”
Presidenti francez Emmanuel Macron dhe bashkëshortja e tij, Brigitte, po planifikojnë të paraqesin prova fotografike dhe shkencore në një proces gjyqësor në SHBA, për të vërtetuar se zonja Macron është grua.
Çifti presidencial ka ngritur një padi për shpifje kundër influencueses së djathtë Candace Owens, pasi kjo e fundit promovoi një teori që pretendon se Brigitte Macron ka lindur mashkull.
Avokatët e Owens kanë kërkuar që padia të hidhet poshtë, duke argumentuar se është ngritur në shtetin Delaware – aty ku janë të regjistruara bizneset e saj – ndërsa ajo jeton në Tennessee. Sipas tyre, të mbrosh një çështje në Delaware do të sillte vështirësi të mëdha financiare dhe operacionale.
Duke folur për podcast-in e BBC-së Fame Under Fire, avokati i familjes Macron, Tom Clare, tha se zonja Macron i ka përjetuar akuzat si tepër shqetësuese, duke i cilësuar si një “shqetësim të panevojshëm” për presidentin francez.
“Nuk dua të them se kjo e ka shkundur nga pozicioni i tij, por si çdo njeri tjetër që përpiqet të balancojë jetën profesionale me atë familjare, kur familja jote sulmohet, ndikon. Dhe ai nuk është imun ndaj kësaj, vetëm sepse është president,” – tha Clare.
Më herët, Candace Owens është shprehur se beson se ajo që thotë është e vërtetë, dhe se “nuk ka gjë më amerikane se liria e fjalës dhe e drejta për të kritikuar.”