Komisioni Evropian do të prezantojë dhe miratojë më 7 tetor një strategji të re që parashikon kufizim të drejtash për anëtarët e rinj të Unionit, por edhe heqjen e vetos duke kaluar në vendimmarrje me shumicë të cilësuar për një sërë fushash, përfshirë edhe zgjerimin.
Qëllimi, sipas Radios Evropa e lirë që ka zbuluar detajet është që përfshirja e vendeve të reja në Union të mos e vështirësojë edhe më tej vendimmarrjen brenda Bllokut.
Në bazë të ndryshimeve, vendet e ardhshme anëtare te BE-së nuk do të kishin mundësi të bllokonin vendimet brenda BE-së gjatë viteve të para të anëtarësimit.
Ata duhet të zotohen të mos bllokojnë vendimet e Këshillit që kërkojnë unanimitet. Në këmbim komisioni do të angazhohet të gjejë zgjidhje të çështjeve që anëtarët e rinj i konsiderojnë si interesa kombëtare.
Një tjetër ndryshim u jep të drejtë anëtarëve ekzistues të BE-së të mund të marrin masa nëse anëtarët e rinj devijojnë nga detyrimet e marra përsipër.
Kjo do të ndodhë në rast se mangësitë në sundimin e ligjit rrezikojnë menaxhimin financiar të buxhetit të BE-së.
Në rast të shkeljeve të rënda mund të shkohet deri në pezullim të përkohshëm të disa të drejtave që rrjedhin nga anëtarësimi. Anëtarët e rinj nuk do të kenë automatikisht as komisionerët e tyre në Komisionin Europian.
Pak ditë më parë e përditshmja Politiko raportoi nga burime të saj në Bruksel se BE-ja po harton një udhërrëfyes të posaçëm për Shqipërinë, Malin e Zi, Ukrainën dhe Moldavinë që konsiderohen, vendet më pranë anëtarësimit.
Drafti do të ketë detyra dhe afate të qarta deri në bashkimin me unionin.