Komisioni Evropian është duke punuar për përgatitjen e një udhërrëfyesi të ri për zgjerimin, në të cilin pritet të mbështesë zyrtarisht objektivin e Shqipërisë për të mbyllur negociatat e anëtarësimit në Bashkimin Evropian deri në dhjetor të vitit 2027.
Lajmi është konfirmuar nga zyrtarë të BE-së për Euronews, duke i dhënë kështu një njohje formale kornizës kohore për të cilën Tirana zyrtare ka insistuar prej kohësh. Afati i fundvitit 2027 është mbrojtur vazhdimisht nga kryeministri Edi Rama dhe zyrtarë të tjerë të lartë shqiptarë, të cilët e kanë cilësuar këtë kalendar si një plan të dakordësuar me ekzekutivin e BE-së.
Me publikimin e dokumentit të ri, ky synim do të marrë për herë të parë një vulë zyrtare nga vetë Komisioni Evropian. Udhërrëfyesi i ri nuk do të mjaftohet vetëm me konfirmimin e datës, por do të përmbajë gjithashtu një listë me reforma kyçe dhe detyra prioritare që Shqipëria duhet të përmbushë me çdo kusht gjatë muajve të ardhshëm, me qëllim që të mbyllë të gjithë kapitujt e negociatave brenda vitit të ardhshëm.
Pavarësisht kësaj mbështetjeje të fortë politike, zyrtarët në Bruksel nënvizojnë se procesi i integrimit mbetet i bazuar në meritë individuale. Si rregull i përgjithshëm, ekzekutivi i BE-së nuk vendos afate të prera përfundimtare për vendet kandidate, pasi ecuria varet tërësisht nga shpejtësia dhe cilësia e reformave që zbaton secili shtet.
Sidoqoftë, përfshirja e vitit 2027 në udhërrëfyesin zyrtar tregon një vullnet të qartë politik nga ana e Brukselit për të përshpejtuar procesin e integrimit të Shqipërisë dhe për t’i dhënë vendit një shtysë konkrete drejt anëtarësimit të plotë.