Pas katër edicionesh radhazi në “Big Brother VIP Kosova”, Jonida Vokshi ka konfirmuar se nuk do të jetë pjesë e sezonit të pestë të reality show-t.
Lajmin moderatorja e ka bërë të ditur përmes rrjeteve sociale, duke treguar se këtë sezon do ta ndjekë formatin nga ana tjetër e ekranit. Për të, ky është një ndryshim i madh pas katër vitesh të lidhura ngushtë me spektaklin.
Jonida ka rrëfyer se eksperienca në BBVK ka qenë pjesë e një prej periudhave më intensive të jetës së saj, duke e shoqëruar në momente të rëndësishme personale dhe profesionale. Ajo ka kujtuar emocionet, sfidat dhe ndryshimet që ka përjetuar gjatë këtyre viteve.
Vendimi për t’u larguar duket se lidhet kryesisht me dëshirën për të ngadalësuar ritmin dhe për t’i kushtuar më shumë kohë familjes së saj dhe dy fëmijëve. Moderatorja ka pranuar se vitet e fundit kanë qenë të ngarkuara dhe se tashmë ka nevojë të jetë më e pranishme në jetën e tyre.
Megjithatë, Jonida e ka bërë të qartë se kjo nuk është një lamtumirë përfundimtare nga televizioni. Përkundrazi, ajo lë të kuptohet se mund të rikthehet me projekte të tjera që i ka menduar prej kohësh.
“Një kapitull që nuk po e mbyll me pikë. Thjesht po vendos një presje”, është shprehur ajo, duke i uruar njëkohësisht sukses Alaudin Hamitit dhe Olsa Muhametit në edicionin e ri.
Jonida Vokshi ka qenë pjesë e BBVK që prej edicionit të parë, në krah të Alaudin Hamitit. Sezoni i pestë pritet të nisë në tetor dhe do të jetë i pari pa moderatoren në këtë rol.
