Zëvendësdrejtoresha e Përgjithshme e Autoritetit Kombëtar për Sigurinë Kibernetike, znj. Floreta Faber, po përfaqëson Shqipërinë në sesionin e parë plenar të Mekanizmit Global për Teknologjitë e Informacionit dhe Komunikimit në kontekstin e sigurisë ndërkombëtare dhe sjelljen e përgjegjshme të shteteve në përdorimin e TIK, që po zhvillohet në selinë e Kombeve të Bashkuara në New York.
Gjatë diskutimit mbi kërcënimet ekzistuese dhe potenciale, znj. Faber paraqiti vlerësimin e Shqipërisë mbi një mjedis kibernetik gjithnjë e më kompleks, të karakterizuar nga sulme të sofistikuara, të vazhdueshme dhe të koordinuara ndaj institucioneve publike, infrastrukturave kritike dhe qytetarëve.
Në deklaratën e saj, ajo bëri të ditur se gjatë vitit 2025 Shqipëria regjistroi 51 incidente kibernetike me ndikim të konsiderueshëm, ndërsa në vitin 2026 janë evidentuar mbi 17.7 milionë tentativa sulmesh ndaj sistemeve dhe infrastrukturave shqiptare, nga të cilat 9 raste janë klasifikuar si incidente të konfirmuara të sigurisë kibernetike. Ajo iu referua gjithashtu operacioneve kibernetike të mbështetura nga shtete ndaj institucioneve publike shqiptare, si dhe ndërthurjes së tyre me dezinformimin dhe përpjekjet për të manipuluar perceptimin publik, për të krijuar pasiguri dhe për të cenuar besimin tek institucionet.
Një tjetër çështje e ngritur nga Shqipëria ishte ndikimi i veprimtarive të dëmshme online tek të rinjtë, përfshirë bullizmin kibernetik, manipulimin e përmbajtjeve dhe rreziqet e shtuara nga keqpërdorimi i Inteligjencës Artificiale.
Në kuadër të punimeve, Shqipëria theksoi gjithashtu rëndësinë e përfshirjes së qeverive, sektorit privat, akademisë, komunitetit teknik dhe shoqërisë civile në përballimin e sfidave kibernetike, si dhe rikonfirmoi angazhimin për forcimin e bashkëpunimit ndërkombëtar dhe zbatimin e kuadrit të Kombeve të Bashkuara për sjelljen e përgjegjshme të shteteve në hapësirën kibernetike.