Me temperaturat që në shumë zona arrijnë ose kalojnë 40°C, kujdesi për ushqyerjen bëhet po aq i rëndësishëm sa edhe hidratimi. Gjatë ditëve të nxehta, organizmi humbet më shumë lëngje dhe minerale përmes djersitjes, ndaj ekspertët këshillojnë një regjim ushqimor të lehtë, të pasur me ujë, vitamina dhe elektrolite.
Një nga zgjedhjet më të mira janë frutat e stinës si shalqiri, pjepri, pjeshkët, kajsitë dhe qershitë. Ato kanë përmbajtje të lartë uji, ndihmojnë në hidratim dhe furnizojnë trupin me vitamina e antioksidantë. Po aq të rekomanduara janë edhe perimet si kastravecat, domatet, marulet dhe spinaqi, të cilat mund të konsumohen në sallata të freskëta dhe të lehta.
Kosi natyral është një tjetër alternativë ideale gjatë vapës, pasi është i pasur me proteina dhe probiotikë, ndërsa peshku i pjekur ose i zier rekomandohet në vend të mishrave të yndyrshëm, sepse tretet më lehtë dhe nuk rëndon organizmin.
Përveç ushqimit, mos harroni të pini ujë rregullisht gjatë gjithë ditës, edhe nëse nuk ndjeni etje. Mund të konsumoni edhe ujë me limon ose çajra të ftohtë pa sheqer. Në të njëjtën kohë, kufizoni pijet me shumë sheqer, alkoolin dhe ushqimet e skuqura apo shumë të kripura, pasi ato mund të favorizojnë dehidratimin.
Një regjim i balancuar, i pasur me fruta, perime dhe lëngje, jo vetëm që ju ndihmon të përballoni më mirë temperaturat e larta, por ul edhe rrezikun e lodhjes, dehidratimit dhe problemeve të tjera që lidhen me të nxehtin ekstrem.