Marc Cucurella njihet në mbarë botën jo vetëm për paraqitjet e tij në fushën e blertë, por edhe për flokët e gjatë kaçurrela, të cilët janë kthyer në shenjën e tij dalluese. Megjithatë, pas këtij imazhi karakteristik fshihet një histori prekëse familjare.
Futbollisti spanjoll ka zbuluar se nuk i lidh kurrë flokët për një arsye shumë të veçantë: djali i tij i madh, Mateo, i cili është në spektrin e autizmit, e identifikon më lehtë të atin në fushë pikërisht falë flokëve të tij të gjatë. Për shkak të vështirësive që Mateo ka në njohjen e njerëzve në ambiente të mbushura me shumë persona, pamja karakteristike e Cucurellas e ndihmon ta dallojë menjëherë gjatë ndeshjeve.
Mbrojtësi ka treguar se diagnoza e djalit ndryshoi tërësisht jetën e familjes së tij dhe e bëri të shihte botën me një këndvështrim krejtësisht ndryshe. Ai dhe partnerja e tij, Claudia Rodríguez, kanë folur hapur për sfidat e përditshme të rritjes së një fëmije me autizëm dhe për përkushtimin e tyre për t’i ofruar mbështetjen më të mirë të mundshme.
Për Cucurellën, flokët nuk janë thjesht një stil apo një imazh publik. Ato janë një premtim dhe një mënyrë për ta bërë djalin e tij të ndihet më i sigurt sa herë që e sheh në fushë. Ky gjest i thjeshtë është kthyer në një simbol të dashurisë së pakushtëzuar të një babai për fëmijën e tij.
Historia e tij ka prekur mijëra tifozë në mbarë botën, duke treguar se pas suksesit në futboll fshihen edhe sfida personale dhe sakrifica që shpesh nuk shihen nga publiku