Kupa e Botës 2026 premton jo vetëm spektakël në fushën e lojës, por edhe një përvojë krejtësisht të re për tifozët në stadiume.
FIFA ka prezantuar konceptin e ri të ceremonive para ndeshjeve, me synimin për të afruar edhe më shumë skuadrat me publikun.
Sipas organizatorëve, çdo stadium do të shndërrohet në një skenë të përbashkët ku lojtarët dhe tifozët do të jenë pjesë e të njëjtit spektakël.
Në ceremonitë para takimeve do të përdoren flamuj gjigantë të vendeve pjesëmarrëse, si dhe elementë të veçantë të vendosur në fushën e lojës për të krijuar një atmosferë sa më mbresëlënëse.
Risi do të ketë edhe në hyrjen e futbollistëve. Lojtarët do të shoqërohen nga pjesëmarrës të programit rinor të FIFA-s dhe do të hyjnë në fushë përmes një strukture të posaçme të vendosur pranë tunelit të stadiumit.
Një nga ndryshimet më të rëndësishme lidhet me interpretimin e himneve kombëtare. Ndryshe nga edicionet e mëparshme, nuk do të jenë vetëm njëmbëdhjetë titullarët në qendër të ceremonisë, por të gjithë futbollistët e grumbulluar për ndeshjen do të pozicionohen në qendër të fushës, duke u bërë pjesë e momentit ceremonial.
Pas përfundimit të himneve, ceremonia do të vazhdojë me procedurat tradicionale, përfshirë përshëndetjet zyrtare, fotografitë e skuadrave dhe hedhjen e shortit mes kapitenëve.
Ndërkohë, në fazat finale të turneut pritet të shtohen edhe efekte speciale, si tymi me ngjyra dhe fishekzjarrët, në një përpjekje për ta bërë Botërorin 2026 një nga edicionet më spektakolare në historinë e kompeticionit.
Kupa e Botës 2026 do të nisë më 11 qershor dhe do të transmetohet ekskluzivisht në Televizionin Kombëtar Klan.