Nëse shpesh e gjeni veten duke u rrotulluar në shtrat pa gjumë, ndoshta zgjidhja nuk është te ilaçet, por te ajo që vendosni në pjatë. Disa ushqime kanë veti natyrale që ndihmojnë trupin të relaksohet dhe të përgatiset për një gjumë të qetë.
Një nga grupet më të rekomanduara janë arrat dhe bajamet. Ato përmbajnë melatoninë dhe magnez, elementë që ndihmojnë në rregullimin e ciklit të gjumit dhe relaksimin e muskujve.
Edhe frutat si kivi apo qershitë mund të jenë një zgjedhje e mirë për mbrëmjen. Këto ushqime janë të pasura me antioksidantë dhe substanca që ndikojnë pozitivisht në cilësinë e gjumit.
Bananet janë një tjetër alternativë e thjeshtë dhe e shëndetshme. Ato përmbajnë triptofan dhe minerale si magnezi dhe kaliumi, të cilat ndihmojnë në uljen e tensionit dhe krijojnë ndjesinë e qetësisë para gjumit.
Ndërkohë, pijet e ngrohta si çaji i kamomilit apo qumështi janë të njohura për efektin e tyre qetësues. Ato ndihmojnë në reduktimin e stresit dhe përgatisin organizmin për një gjumë më të thellë.
Ekspertët sugjerojnë që këto ushqime të konsumohen disa orë para gjumit dhe të shmangen produktet e rënda apo me kafeinë, të cilat mund të prishin ritmin natyral të gjumit.