Një aksident i rëndë me pasojë vdekjen e një fëmije 7-vjeçar është regjistruar mëngjesin e sotëm në fshatin Mengël të Elbasanit. Sipas informacioneve paraprake, i mituri është përplasur nga një automjet pranë shkollës ku studionte, duke humbur jetën rrugës për në spital si pasojë e plagëve të marra.
Burime nga policia bëjnë me dije se automjeti që shkaktoi aksidentin tragjik drejtohej nga shtetasi P. B., 61 vjeç. Ai është identifikuar si regjisori dhe producenti i njohur i “Misse-ve”, Petri Bozo, i cili është njëkohësisht edhe djali i Luljeta Bozos, inxhiniere, pedagoge dhe ish-deputete e Partisë Socialiste.
Pas ngjarjes, Bozo është shoqëruar menjëherë në ambientet e komisariatit për veprime të mëtejshme procedurale dhe për të dhënë shpjegime mbi rrethanat e aksidentit.
Sipas njoftimit zyrtar të policisë, aksidenti i rëndë ndodhi rreth orës 08:00 të mëngjesit të sotëm në aksin rrugor “Elbasan-Librazhd”.
Grupi hetimor dhe ekspertët e qarkullimit rrugor ndodhen në vendngjarje dhe po punojnë intensivisht për zbardhjen e plotë të dinamikës dhe shkaqeve që çuan në këtë ngjarje të rëndë.
