Udhëzimet e reja ushqimore në SHBA po rekomandojnë një konsum më të lartë proteinash, rreth 1.2 deri në 1.6 gram për kilogram të peshës trupore. Por ekspertët theksojnë se më e rëndësishme se sasia është burimi i proteinës.
Sipas specialistëve nga University of California, Davis dhe New York University, shumë njerëz po përpiqen të shtojnë proteinat në dietë, por zgjedhja e ushqimeve luan rol kyç për shëndetin.
Proteinat shtazore si mishi pa dhjamë, pula dhe vezët konsiderohen burime “të plota”, pasi përmbajnë të gjitha aminoacidet esenciale, si edhe hekur dhe vitamina B. Megjithatë, ekspertët paralajmërojnë se disa lloje mishi, sidomos ato të përpunuara si proshuta, lidhen me rreziqe për shëndetin për shkak të yndyrnave të ngopura dhe substancave kancerogjene.
Peshku mbetet një nga zgjedhjet më të mira për zemrën falë omega-3, ndërsa vezët nuk konsiderohen më një rrezik i madh për sëmundjet e zemrës tek shumica e njerëzve.
Nga ana tjetër, ekspertët rekomandojnë shtimin e proteinave bimore si thjerrëzat, fasulet dhe tofu në regjimin e përditshëm ushqimor. Këto ushqime kanë më pak kalori dhe yndyrna të ngopura, ndërsa janë të pasura me fibra, një element që shumica e njerëzve nuk e konsumojnë mjaftueshëm.
Ekspertët gjithashtu paralajmërojnë për përdorimin e tepërt të pluhurave proteinikë, të cilët shpesh janë ushqime ultra të përpunuara dhe nuk ofrojnë të njëjtat vlera ushqyese si ushqimet natyrale.
Sipas tyre, një dietë e balancuar me burime të ndryshme proteinash dhe ushqime sa më natyrale ndihmon jo vetëm në rikuperimin e trupit dhe forcimin e imunitetit, por edhe në mbrojtjen e shëndetit afatgjatë.