Shumë njerëz zgjohen në mëngjes duke kujtuar çdo detaj të ëndrrës së natës, ndërsa të tjerë nuk mbajnë mend asgjë. Sipas ekspertëve, kjo lidhet me mënyrën si funksionon truri gjatë gjumit dhe me momentin kur zgjohemi.
Studiuesit shpjegojnë se ëndrrat ndodhin më shpesh gjatë fazës REM të gjumit, periudha kur aktiviteti i trurit është shumë i lartë. Personat që zgjohen gjatë ose menjëherë pas kësaj faze kanë më shumë gjasa të kujtojnë ëndrrat e tyre.
Edhe personaliteti mund të luajë rol. Disa studime sugjerojnë se njerëzit më emocionalë, kreativë ose ata që kalojnë më shumë kohë duke reflektuar mbi mendimet e tyre priren të kujtojnë më shpesh ëndrrat.
Nga ana tjetër, stresi, lodhja dhe mungesa e gjumit mund të ndikojnë negativisht në kujtesën e ëndrrave. Ekspertët thonë se personat që flenë pak ose kanë gjumë të ndërprerë shpesh e kanë më të vështirë të mbajnë mend çfarë kanë ëndërruar.
Interesant është fakti se truri “fshin” shumë shpejt informacionin e ëndrrave pas zgjimit. Nëse nuk i kujton menjëherë, zakonisht ato harrohen brenda pak minutash.
Për ata që duan të kujtojnë më shumë ëndrrat, specialistët rekomandojnë mbajtjen e një ditari pranë shtratit dhe shënimin e çdo detaji sapo zgjohen. Sipas tyre, kjo e stërvit trurin të ruajë më mirë kujtimet e ëndrrave me kalimin e kohës.