Ndikuar nga faktorë të ndryshëm, tregu i punës ka pësuar ndryshime të dukshme vitet e fundit, por cilat janë aktualisht profesionet më të kërkuara në vend?
“Me arsim të lartë, pozicione që lidhen me financën, ekonomistë, inxhinierë të ndërtimit, drejtues të shërbimeve të shitjes, specialistë të komunikimimit dhe pozicione që lidhen me teknologjinë që kanë pasur një rritje të shpejtë”, pohoi Klevis Hysa, drejtor i përgjithshëm i Agjencisë Kombëtaret ë Punësimit dhe Aftësive.
Për profesionet ku jo domosdoshmërisht kërkohet arsimi i lartë, mbizotërojnë ato që kanë të bëjnë me shërbimet në fushën e turizmit.
Tregu i punës në vend gjithnjë dhe më shumë ka nevojë për zanatçinj, por të rinjtë nuk i preferojnë, ndonëse kërkesa për ta është e lartë.
“Elektriçistë, hidraulikë, marangozë, muratorë. Kërkesë të lartë ka për profesionet e zejtarisë, zanatçinjve. Kjo thekson më shumë nevojën e orientimit drejt arsimit profesional”, u shpreh Hysa.
Ndërkohë, ekspertët rekomandojnë një këshillim më të mirë të të rinjve, që në fillesat e hershme të arsimit bazë, për t’i orientuar ata drejt nevojave që ka tregu për punë.
“Lidhja zinxhir e të gjitha proceseve që të mundësonin një përputhje të plotë mes kërkesës dhe ofertës. Me identifikimin e talenteve tek të rinjtë. Një orientim shumë i mirë për ata që janë studentë që të informohen saktë. Dhe nga ana tjeter, bizneset të standardizojnë vetveten, të punësojnë përmes një procesi të drejtë rekrutimi”, deklaroi Erjon Muçaj, këshillues karriere.
Agjencia Kombëtare e Punësimit shpall çdo muaj rreth 6 mijë vende të lira pune.