Eurovizioni po përballet me një valë të paprecedentë reagimesh, pasi Irlanda, Spanja, Holanda dhe Sllovenia kanë njoftuar se do të bojkotojnë edicionin e ardhshëm të festivalit. Vendimi vjen pasi Izraelit iu lejua të marrë pjesë, pavarësisht kërkesave të forta nga disa transmetues që kërkonin përjashtimin e tij për shkak të kostos humanitare të luftës në Gaza.
Këto shtete ishin ndër më të zëshmet për mospjesëmarrjen e Izraelit, duke argumentuar se situata aktuale është e papajtueshme me vlerat që Eurovision pretendon të përfaqësojë. Megjithatë, pavarësisht thirrjeve dhe kërkesave për votim, anëtarët e organizatës miratuan rregulla të reja që sipas tyre synojnë të “mbrojnë integritetin e festivalit”.
Transmetuesi publik i Holandës reagoi ashpër, duke deklaruar se “pjesëmarrja në rrethana të tilla është e papajtueshme me vlerat publike që ne i konsiderojmë thelbësore”.
Nga ana tjetër, RTVE në Spanjë njoftoi se vendimi për t’u tërhequr nga Eurovizioni ishte marrë që prej shtatorit, me kushtin që Izraeli të mbetej pjesë e garës. Ky qëndrim është mirëpritur gjerësisht nga publiku spanjoll.
Edhe Sllovenia dhe Islanda i janë bashkuar bojkotit, ndërsa organizatorët përpiqen të minimizojnë ndikimin e situatës. Drejtori i Eurovizionit, Martin Green, u shpreh se konkursi nuk është në krizë dhe se vendimet janë marrë përmes një “procesi demokratik”, duke mbrojtur neutralitetin e festivalit.
Eurovizioni, që daton që nga viti 1956 dhe ndiqet nga rreth 160 milionë shikues, ndodhet tani përballë një prej polemikave më të mëdha në historinë e tij.