Një studim i ri nga Qendra Australiane e Kancerit Peter MacCallum në Melbourne ka zbuluar se ushqyerja me gji mund të ketë një efekt të fuqishëm mbrojtës kundër kancerit të gjirit. Sipas kërkuesve, gratë që kanë ushqyer me gji zhvillojnë qeliza imune të specializuara që qëndrojnë aktive në indin e gjirit për dekada, duke ndihmuar trupin të luftojë qelizat anormale që mund të shndërrohen në kancer.
“Ne zbuluam se gratë që kanë ushqyer me gji kanë qeliza T CD8⁺, të cilat ‘jetojnë’ në indin e gjirit për shumë vite pas lindjes dhe janë të gatshme për të sulmuar qelizat e rrezikshme,” tha profesorja Sherene Loi, onkologe mjekësore dhe autore kryesore e studimit.
Ky proces lidhet me rimodelimin e gjirit gjatë dhe pas ushqyerjes me gji, në fazën e quajtur involucion, e cila sipas studiuesve është kyçe për krijimin e këtyre qelizave mbrojtëse.
Studimi, i publikuar në revistën Nature, analizoi 1,000 gra që kishin zhvilluar kancer të gjirit trefish negativ, një nga format më agresive të sëmundjes. Rezultatet treguan se gratë që kishin ushqyer me gji kishin tumore më pak agresive dhe një përgjigje imune më të fortë sesa ato që nuk e kishin bërë këtë.
Sipas Loi, ky mekanizëm mund të jetë zhvilluar për të mbrojtur nënat gjatë periudhës së paslindjes, por sot përfaqëson një “mburojë biologjike natyrore” kundër kancerit të gjirit.