Në prag të fillimit të vitit të ri shkollor, Drejtoria e Përgjithshme e Policisë së Shtetit ka hartuar një plan të detajuar për garantimin e rendit dhe sigurisë publike në institucionet arsimore publike dhe jopublike.
Drejtori i Drejtorisë së Rendit Publik, Agron Çeli, deklaroi sot, 5 shtator, se masat kanë për qëllim parandalimin e ngjarjeve kriminale, aksidenteve rrugore dhe çdo rreziku për nxënësit gjatë fillimit dhe zhvillimit të procesit mësimor.
“Strukturat e Policisë do të jenë prezente pranë shkollave, duke përfshirë patrullat e kontrollit të territorit, policinë rrugore, forcat e posaçme dhe specialistët e policimit në komunitet,” deklaroi ai.
Ai thekson se veprimet do të koordinohen me policitë bashkiake, drejtuesit e shkollave, oficerët e sigurisë dhe autoritetet lokale për të garantuar një mjedis të sigurt për nxënësit.
Policia Rrugore do të intensifikojë kontrollet në rrugët pranë shkollave, duke monitoruar transportin e nxënësve, gjendjen teknike të automjeteve dhe respektimin e rregullave të qarkullimit.
Gjithashtu do të punohet për mbylljen apo largimin e lokaleve të tregtisë dhe pikave ambulante të shitjes që tregtojnë pije alkoolike, produkte ushqimore të skaduara pranë shkollave, të cilat jo rrallë herë shërbejnë dhe si pika të grumbullimit të shtetasve me precedent kriminal.
Në kuadër të Paketës për Sigurinë në Shkolla, punonjësit e Policisë së Shtetit do të bashkëpunojnë me Ministrinë e Arsimit, Inspektoratin Shëndetësor, AKU-në dhe pushtetin vendor, për të parandaluar çdo veprimtari kriminale ose fenomene negative brenda dhe jashtë shkollave.