Nga viti 2008 deri në 2025, vendet e Bashkimit Europian kanë dhënë mbi 1 milion leje qëndrimi për herë të parë për shtetasit shqiptarë, duke treguar përmasat e emigrimit gjatë këtyre viteve. Në total, bëhet fjalë për 1,082,224 leje qëndrimi, ndërsa numri ka ardhur duke u rritur sidomos gjatë periudhës së fundit.
Italia mbetet vendi që ka dhënë më shumë leje për shqiptarët, me rreth 500 mijë, e ndjekur nga Greqia me 311 mijë dhe Gjermania me rreth 124 mijë. Ndërkohë, vitet e fundit Gjermania është kthyer në një nga destinacionet kryesore për shqiptarët, veçanërisht për ata që kërkojnë mundësi punësimi.
Vetëm gjatë vitit 2025 janë dhënë 68,653 leje të reja qëndrimi për shtetasit shqiptarë, rreth 4% më shumë krahasuar me vitin 2024. Italia kryeson me 31.7 mijë leje, ndërsa Gjermania renditet e dyta me rreth 17 mijë, e ndjekur nga Greqia me 10 mijë.
Sa i përket arsyeve të largimit, pjesa më e madhe e lejeve në vitin 2025 lidhej me bashkimin familjar, që përbënte 46.3% të totalit. Ndërsa 29.4% e lejeve u dhanë për arsye punësimi dhe vetëm 0.8% për qëllime arsimimi.