Siguria kibernetike është bërë pjesë e kurrikulës shkollore për klasat e para, të gjashta dhe të dhjeta. Nxënësit do të mësojnë si të jenë më të sigurt gjatë përdorimit të internetit dhe teknologjisë.
Programi do t’i ndihmojë fëmijët të dallojnë informacionet e rreme, përfshirë përmbajtjet e krijuara nga inteligjenca artificiale, si dhe të kuptojnë çfarë të dhënash duhet të ndajnë online. Gjithashtu, do të mësojnë si të reagojnë në raste bullizimi apo abuzimi në internet.
Me nisjen e vitit shkollor, ekspertët e Autoritetit për Sigurinë Kibernetike do të trajnojnë mësuesit për këto tema. Vetëm gjatë vitit të kaluar, pranë autoritetit u raportuan 240 raste, ndërsa synimi është që programi të shtrihet edhe në klasa të tjera.