Deti i thellë është një nga vendet më të huaja dhe më të papërshtatshme për jetën në planetin Tokë. Me presione që do të shtypnin lehtësisht çdo qenie tokësore dhe temperatura që do ta bënin një dimër arktik të dukej i ngrohtë, oqeani i thellë nuk duhet të ishte në gjendje të mbështeste jetën. Por jeta gjithmonë gjen një mënyrë.
Ne dimë më pak për pjesët më të thella të oqeaneve tona sesa për hapësirën e jashtme! Fundi i detit mund të konsiderohet si një planet tjetër. Kafshët që kanë evoluar për të jetuar atje me siguri duken sikur nuk janë nga Toka dhe kanë zhvilluar mënyra tepër të çuditshme për të mbijetuar. Disa nga kafshët më të pazakonta në botë jetojnë në detin e thellë. Ja lista jonë me 5 krijesat më të çuditshme të detit të thellë!
Peskatricja
Një nga krijesat më të frikshme të detit të thellë është peskatricja. Ky peshk me pamje demonike e ka marrë emrin nga karremi ndriçues që del nga balli i tij. Ai e përdor këtë zgjatim mishor për të tërhequr prenë përpara se ta kapë me dhëmbët e tij tepër të gjatë. Pjesa që ndriçon prodhohet nga baktere biolumineshente të vendosura në majën e karremit.
Ndoshta gjëja më e çuditshme te ky peshk është rituali i çiftëzimit. Meshkujt janë shumë, shumë më të vegjël se femrat. Ata e kalojnë gjithë jetën duke kërkuar një partnere. Kur më në fund gjejnë një femër, ngjiten pas saj me gojë dhe me kalimin e kohës bashkojnë të gjithë trupin me të! Pa u lidhur me një femër, një mashkull i këtij lloji nuk arrin as të rritet.
Peshku syfuçi
Peshku syfuçi është një nga krijesat me pamjen më alienenë oqean. Në shikim të parë mund të mendoni se ky peshk nuk ka sy. Në fund të fundit, kush ka nevojë të shohë kur jeton në ujëra pothuajse krejtësisht të errëta?
Por, nëse e shikoni më nga afër, peshku syfuçi ka dy sfera të mëdha jeshile të ndezura në mes të kafkës së tij të tejdukshme. Çfarë janë ato? Janë sytë! Rezulton se peshku syfuçika dy sy që qëndrojnë të fiksuar në një pozicion, duke parë gjithmonë lart përmes kokës së tij transparente. Ky peshk i pazakontë vëzhgon ujërat sipër vetes, duke kërkuar hijet e krijesave që lëvizin mbi të për të gjetur prenë.
Kallamari vampir
Ndryshe nga sa lë të kuptohet emri i tij, kallamari vampir nuk thith gjak. Madje ai nuk ka as ventuza në tentakulat e tij. Emri i tij vjen nga sytë e kuq të ndezur dhe struktura e tentakulave që i ngjan një manteli.
Sytë e kallamarit vampir janë më të mëdhenjtë në botë në raport me madhësinë e trupit të tij.
Thellësia ku jeton ky kallamar quhet “zona minimale e oksigjenit”, sepse nuk ka mjaftueshëm oksigjen për të mbështetur metabolizmin aerob. Teorikisht, një kallamar nuk duhet të ishte në gjendje të mbijetonte aty. Megjithatë, kallamari vampir duket se nuk shqetësohet fare dhe lulëzon në këtë mjedis!
Peshkaqeni gojëmadh
Peshkaqeni gojëmadh është një nga kafshët më të rralla në botë. Ai u pikas për herë të parë vetëm në vitin 1979 dhe që atëherë është parë më pak se 100 herë!
Ai është parë ose kapur rastësisht në oqeanet Paqësor, Atlantik dhe Indian, si edhe pranë brigjeve jugore të Afrikës së Jugut. Për një kafshë kaq të rrallë, është e çuditshme që shtrihet në një zonë kaq të madhe.
Dihet shumë pak për këtë peshkaqen. Për shkak të gojës së tij gjigante dhe dhëmbëve të vegjël, shkencëtarët besojnë se ai noton me nofullat hapur për të kapur plankton, njësoj si ushqyesit e tjerë filtrues. Fakti që dihet kaq pak për të e bën peshkaqenin gojëmadh një nga krijesat më të çuditshme të detit të thellë.