Kartëmonedha 500 euro së shpejti nuk do të jetë më në qarkullim. Banka Qendore Europiane ka vendosur të ndalojë prodhimin e saj duke nisur nga seritë e ardhshme të parasë fizike.
Vendimi erdhi pasi kartëmonedha me prerjen më të madhe është përdorur shpesh për aktivitete të paligjshme, nga financimi i terrorizmit deri te pastrimi i parave, aq sa është quajtur me nofkën “kartëmonedha Bin Laden ” midis agjencive evropiane të zbatimit të ligjit.
Banka Europiane është angazhuar në një fushatë të gjerë për të rishikuar kartëmonedhat e saj dhe ky është parë momenti i përshtatshëm për të ndërhyrë. Kartëmonedhat e ardhshme euro nga seria e trete që pritet të lancohet së shpejti do të paraqesin tematika lidhur me kulturën europiane, lumenjtë e zogjtë. Përparësi do tu jepet prerjeve më të vogla prej 20, 50 dhe 100 euro.
Përmes teknologjisë më të avancuar, do të tregohet më shumë kujdes për ti bërë ato më të gjurmueshme dhe më të vështira për tu falsifikuara.
Por, fundi i prodhimit të kartëmonedhës 500 euro nuk do të thotë se ato që janë në qarkullim do të humbin kursin ligjor, pasi do të vijojnë të përdoren normalisht si mjet pagese. Ato do të tërhiqen dalëngadalë nga tregu pa shkaktuar probleme për qytetarët dhe bizneset.
Debatet për heqjen nga qarkullimi të kartëmonedhës 500 euro kanë nisur prej gati 16 vjetësh, pasi përdorimi i gjerë i saj brenda qarqeve kriminale ka rezultuar si problematike që prej fillimit të përdorimit të saj në vendet e Eurozonës.
Në vitin 2019, 17 nga 19 banka qendrore të Eurozonës kishin ndaluar tashmë lëshimin e këtyre prerjeve të mëdha për të parandaluar përhapjen e tyre. Por, vendimi i Bankës Qendrore Europiane do ta bëjë zyrtarisht kartëmonedhën 500 euro pjesë të së kaluarës.