Çfarë eventi, çfarë atmosfere dhe çfarë mbrëmjeje e veçantë!
Nën shkëlqimin e një bardhësie elegante, ku të gjithë pjesëmarrësit ishin veshur në të bardha, GALA Night 2026 solli një tjetër sukses mbreslënes për CH-APEN dhe Qysh e don Shoqnia.
Mbrëmë, në hapësirat e anijes luksoze MS Diamant në Luzern, u mbajt me sukses edicioni i tretë i këtij organizimi tashmë tradicional.
Rreth 300 pjesëmarrës nga diaspora shqiptare në Zvicër dhe vende të tjera, Kosova e Shqipëria shijuan një mbrëmje të paharrueshme mbi Liqenin e Luzernit, mes panoramave mahnitëse dhe perëndimit spektakolar të diellit në Vitznau.
Programi artistik u moderua nga aktori i njohur Fatmir Spahiu – Bufi, ndërsa atmosferën e ngritën këngëtarja Linda Hakaj nën shoqërinin e talentës së re Trina Haliti dhe padyshim nga performanca energjike e DJ CREEP.
Një vlerë të veçantë eventit i dha ekspozita artistike e Memento Artstudio nga Tirana, e prezantuar nga artisti Dorjan Lala, me punime unike të pikturave të qëndisura. Para të pranishmëve u prezantua gjithashtu edhe projekti Lunaria nga Olsjana Ajdini.
GALA Night 2026 solli së bashku afaristë, profesionistë, artistë dhe personalitete të diasporës shqiptare, duke krijuar një atmosferë elegante, festive dhe miqësore. Ky event po shndërrohet vit pas viti në një nga ngjarjet më prestigjioze të komunitetit shqiptar në Zvicër.
