Një ngjarje tragjike ka tronditur futbollin spanjoll. Sulmuesi i CD Tenerife, Jesús de Miguel Alameda, ka ndërruar jetë në moshën 30-vjeçare, pasi pësoi një arrest kardiak gjatë ndeshjes kundër Andorrës, pas një përplasjeje të fortë me portierin kundërshtar.
Futbollisti u dëmtua rëndë në minutat e fundit të takimit, të zhvilluar të hënën në stadiumin “Heliodoro Rodríguez López”. Portieri i Andorrës, Jesús Owono, doli nga zona e tij për të larguar topin me kokë, por gjatë ndërhyrjes goditi me gju në kokë De Miguelin, i cili u rrëzua menjëherë në fushë.
Situata u përkeqësua brenda pak çastesh, ndërsa lojtarët e të dyja skuadrave kërkuan me urgjencë ndërhyrjen e stafit mjekësor. Mjekët i dhanë ndihmën e parë për rreth pesë minuta në fushë dhe arritën ta rikthenin në jetë pas arrestit kardiak. Më pas, ai u transportua me ambulancë drejt spitalit, ku qëndroi në kujdes intensiv.
Megjithatë, pavarësisht përpjekjeve të mjekëve, gjendja e tij neurologjike u përkeqësua gjatë orëve të para të mëngjesit dhe futbollisti ndërroi jetë këtë të martë, më 3 nëntor, rreth orës 08:00.
Përplasja shkaktoi tronditje edhe te lojtarët në fushë. Portieri Jesús Owono u ndëshkua me karton të kuq të drejtpërdrejtë, ndërsa ndeshja, e cila në atë moment ishte në rezultatin 2-2, u ndërpre me marrëveshjen e të dyja skuadrave. Sipas raportit të arbitrit, futbollistët deklaruan se nuk ishin në gjendje emocionale për të vazhduar lojën.
Vdekja e 30-vjeçarit ka shkaktuar reagime të shumta në futbollin spanjoll. Real Madrid, Barcelona, Atlético Madrid, si dhe shumë klube të tjera, shprehën solidaritetin dhe mbështetjen e tyre gjatë orëve kur lojtari luftonte për jetën.
Mesazhe ngushëllimi dhe mbështetjeje erdhën edhe nga UD Las Palmas, rivalja historike e Tenerife-s, e cila theksoi se përtej ngjyrave dhe rivalitetit sportiv, mbi të gjitha qëndron njerëzimi.
Edhe sulmuesi Jesé Rodríguez, trajneri Albert Sánchez dhe presidenti i LaLiga-s, Javier Tebas, kishin shprehur publikisht shpresën për shërimin e tij, përpara se të mësohej lajmi tragjik.
Klubi CD Tenerife e njoftoi ndarjen e tij nga jeta përmes një deklarate prekëse, ku shprehu dhimbjen për humbjen e futbollistit.