Nisja e sezonit të ri të Big Brother VIP Kosova ka rikthyer në vëmendje edhe ish-banoren Bia Khalifa. Gjatë spektaklit, opinionisti Resul Sinani krahasoi Olechkën, konkurrenten me origjinë nga Bjellorusia, me Bian, duke vënë në dukje mënyrën se si ajo komunikon në gjuhën shqipe.
Përmendja e emrit të saj nuk kaloi pa reagim. Bia reagoi në rrjetet sociale, ku u shpreh se u ndie shumë mirë kur pa një konkurrente me origjinë të huaj që e fliste shqipen aq mirë.
Megjithatë, ajo shfrytëzoi rastin për të kujtuar edhe vështirësitë që kishte përjetuar gjatë qëndrimit në shtëpinë e BBVK-së. Bia pranoi se nuk kishte qenë plotësisht e përgatitur për një format ku komunikimi dhe të shprehurit luajnë një rol kaq të rëndësishëm.
Sipas saj, barriera gjuhësore e kishte vënë shpesh në vështirësi, pasi nuk arrinte të mbronte veten apo të shprehte mendimet e saj ashtu siç dëshironte.
Në reagimin e saj, Bia bëri të ditur se nuk do të marrë pjesë në projekte të tjera televizive pa e perfeksionuar më parë gjuhën shqipe. Në fund, ajo u uroi suksese banorëve të rinj dhe shprehu entuziazmin për këtë edicion të Big Brother VIP Kosova.
