Ashtu sikurse ishte bërë e ditur nga Autoriteti Kombëtar i Ushqimit, prej 3 shtatorit kanë hyrë në fuqi kufizimet e reja për importin e mishit nga Brazili, pas ndryshimeve të miratuara nga Bashkimi Europian dhe të reflektuara edhe nga vendi ynë.
Brazili u hoq nga lista e vendeve të autorizuara për disa kategori produktesh me origjinë shtazore, pasi Komisioni Europian deklaroi se nuk kishte marrë garancitë e nevojshme për shkak të përdorimit të medikamenteve veterinare që rrisin masën muskulare të kafshëve.
Megjithatë, pavarësisht këtij vendimi të vendit tonë, të dhënat zyrtare tregojnë se Shqipëria ka pasur një varësi të konsiderueshme nga produktet e mishit të importuara nga Brazili.
Referuar të dhënave të INSTAT, vetëm gjatë periudhës janar-korrik 2026 Shqipëria importoi gjithsej rreth 28.1 mijë tonë mish dhe të brendshme të ngrënshme, prej të cilave 9.2 mijë tonë erdhën nga Brazili, ose 32.8% të sasisë totale të importuar.
Ky vendim për produktet e mishit brazilian mund t’i detyrojë importuesit të orientohen drejt tregjeve të tjera, që mund të kenë kosto më të larta.
Nga ana tjetër, Autoriteti Kombëtar i Ushqimit sqaron se ngarkesat e mishit të shpendëve dhe të gjedhit me origjinë nga Brazili, për të cilat certifikata shëndetësore veterinare zyrtare është nënshkruar dhe/ose lëshuar përpara datës 3 shtator, do të vijojnë të pranohen në Pikat e Kontrollit Kufitar, edhe nëse këto ngarkesa mbërrijnë në territorin tonë pas kësaj date.