Pas rreth një dekade, Instagram ka prezantuar një ndryshim të ri në identitetin vizual, duke sjellë një version të ri të logos së tij me tekst. Ndryshimi është bërë publik nga drejtori i Instagram, Adam Mosseri, përmes Instagram dhe Threads.
Logoja e re ka një stil më modern, me shkronja dhe kthesa më të theksuara, veçanërisht te shkronjat “s”, “r” dhe “g”. Dizajni i ri ka shkaktuar menjëherë reagime të ndryshme nga përdoruesit: disa e kanë pëlqyer pamjen e re, ndërsa të tjerë e kanë kritikuar dhe madje e kanë ironizuar në rrjetet sociale.
Ndryshimi i fundit i madh në identitetin vizual të Instagram ishte në vitin 2016, kur platforma hoqi ikonën klasike të kamerës dhe prezantoi logon me gradientin shumëngjyrësh që është përdorur deri tani.
Për momentin, nuk është bërë e ditur nëse ky ridizajnim do të shoqërohet edhe me ndryshime të tjera në ikonën e aplikacionit apo në identitetin vizual të platformës.
Një ndryshim pas 10 vitesh që nuk kaloi aspak pa u vënë re nga përdoruesit.