Selin ka reaguar ashpër ndaj pyetjes që Brikena Selmani i drejtoi Gretës gjatë një interviste në “Top Arena”, duke kritikuar jo vetëm përmbajtjen e saj, por edhe mënyrën se si ishte zhvilluar moderimi.
E ftuar në emisionin “Pushime on Top”, Selin u ndal te momenti kur Brikena e pyeti Gretën nëse ajo dhe ish-banorët e tjerë vazhdonin ende të flisnin për të pas përfundimit të eksperiencës së tyre televizive.
Sipas Selin, është e rëndësishme që çdo njeri të ketë vetëbesim, por pa rënë në idenë se çdo bisedë sillet rreth një personi të vetëm.
“Është në rregull kur e vetëvlerëson veten tënde, por njeriu duhet të qëndrojë me këmbë në tokë. Nëse dikush më ka thënë se bota nuk rrotullohet rreth teje, i kam thënë që e imja rrotullohet rreth meje”, u shpreh ajo.
Megjithatë, Selin tha se pyetja e Brikenës i është dukur e panevojshme dhe se kishte pritur që Greta t’i përgjigjej ndryshe.
“Çfarë nuk më ka ardhur mirë ishte një pyetje totalisht pa lidhje dhe më vjen keq që Greta nuk i dha përgjigjen që duhej”, deklaroi ajo.
Selin theksoi se, nëse e njëjta pyetje do t’i ishte drejtuar asaj, nuk do të kishte hezituar të përgjigjej. Ajo ngriti edhe pikëpyetje për faktin se përse Brikena kishte zgjedhur ta pyeste Gretën për të, në vend që ta përballte drejtpërdrejt.
“Nëse Brikena do të m’i kishte bërë mua ato pyetje, do t’i kisha dhënë përgjigjen. Nuk e di pse ajo zgjodhi të pyeste dikë tjetër. Në momentin që pyet dikë për mua, ndërkohë që mua më ke pasur aty dhe nuk më pyete, ose nuk je e gatshme ta dëgjosh përgjigjen time”, tha Selin.
Ajo shtoi se nuk sheh asnjë arsye që emri i saj të vazhdojë të jetë temë diskutimi mes njerëzve me të cilët raporti tashmë ka përfunduar.
“Nuk ka vend për të folur nëpër tavolina për një person me të cilin kam pasur marrëdhënie për aq sa ka zgjatur”, u shpreh ajo.
Në fund, Selin nuk kurseu kritikat as për mënyrën se si Brikena e kishte menaxhuar intervistën, duke theksuar se moderimi kërkon përgatitje dhe studim të vazhdueshëm.
“Mendoj që mund ta kishte shfrytëzuar më mirë moderimin. Nëse aspiron të bëhesh moderatore, minimalja që duhet të bësh është të studiosh. Të studiosh figura që kanë vite në moderim, televizionin dhe rolin e gazetarit”, tha Selin.
Ajo zbuloi se edhe vetë ndjek vazhdimisht emisione dhe moderatorë të njohur për t’u përgatitur për karrierën që synon të ndërtojë në të ardhmen, duke shtuar se kishte disa elemente të paraqitjes së Brikenës që nuk i kishin pëlqyer.