Pas shumë aludimeve që kanë qarkulluar në rrjet për një distancim mes ish-konkurrentëve të Big Brother VIP Kosova, Londrim Mekaj ka vendosur të thyejë heshtjen. Në një intervistë për emisionin SOL, ai ka pranuar se raporti me Elijona Binakajn dhe Klodian Mihajn nuk është më si dikur.
Londrimi u shpreh se mes tyre ka ekzistuar një miqësi shumë e fortë dhe e sinqertë, por me kalimin e kohës marrëdhënia ka ndryshuar. “Ka qenë një shoqëri shumë e bukur, dikur mendonim se ishte ‘too good to be true’. Jemi kënaqur dhe kemi gjetur shumë veten te njëri-tjetri. Sot gëzojmë raport, por natyrisht jo si përpara”, deklaroi ai.
Sipas tij, ftohja ka ardhur si pasojë e disa mosmarrëveshjeve personale dhe situatave të vogla që kanë ndikuar në marrëdhënien e tyre, pa preferuar të zbulojë më shumë detaje. Ai sqaroi gjithashtu se mungesa e tyre në një event të rëndësishëm lidhet pikërisht me këtë periudhë distance.
Megjithatë, Londrimi theksoi se nuk bëhet fjalë për një prishje përfundimtare. Ai u shpreh se vazhdon t’i respektojë dhe t’i vlerësojë shumë Elijonën dhe Klodianin, duke besuar se komunikimi është mënyra më e mirë për të kapërcyer çdo keqkuptim.
“Unë i respektoj shumë, i dua dhe kam për të vazhduar të kem respekt për ta. Jemi të rritur e të pjekur, besoj që komunikimi është çelësi i gjithçkaje. Kemi me i zgjidh krejt… mirë jemi”, u shpreh ai, duke lënë të kuptohet se një pajtim në të ardhmen mbetet i mundur.