Në epokën e rrjeteve sociale, ku pëlqimet, komentet dhe ndjekësit janë kthyer në një formë të re vlerësimi, shumë ekspertë po shtrojnë një pyetje interesante: a po bëhet shoqëria më narciste se kurrë më parë?
Termi “narcizizëm” përdoret për të përshkruar një prirje të tepruar për t’u fokusuar te vetja, nevojën e vazhdueshme për vëmendje dhe dëshirën për t’u admiruar nga të tjerët. Megjithatë, psikologët theksojnë se të kesh vetëbesim apo të ndash momente nga jeta në rrjetet sociale nuk do të thotë automatikisht se je narcist.
Debati është ndezur veçanërisht me rritjen e platformave si Instagram, TikTok dhe të tjera, ku imazhi personal është shpesh në qendër të vëmendjes. Kultura e selfie-ve, ekspozimi i përditshëm i jetës private dhe kërkimi i vazhdueshëm i miratimit nga të tjerët kanë bërë që shumë studiues të pyesin nëse këto platforma po ndikojnë në mënyrën se si e shohim veten.
Disa kërkime sugjerojnë se njerëzit sot janë më të prirur të promovojnë arritjet, pamjen dhe stilin e tyre të jetesës në internet. Nga ana tjetër, ekspertë të tjerë argumentojnë se kjo nuk do të thotë domosdoshmërisht rritje e narcizizmit, por thjesht një mënyrë e re komunikimi dhe prezantimi në botën dixhitale.