Edhe kur nuk kemi mesazhe, njoftime apo telefonata, shumica prej nesh e marrin telefonin në dorë pothuajse pa e kuptuar. Për shumë njerëz, kontrollimi i ekranit është bërë refleks — sapo zgjohemi, gjatë ngrënies, në punë, madje edhe para gjumit.
Sipas psikologëve, kjo lidhet me mënyrën si truri ynë kërkon vazhdimisht stimulim dhe shpërblim të menjëhershëm. Çdo njoftim, “like” apo mesazh aktivizon dopaminën, hormonin që lidhet me kënaqësinë dhe varësinë. Pikërisht kjo e bën telefonin kaq të vështirë për t’u lënë mënjanë.
Ekspertët thonë se truri fillon të presë vazhdimisht diçka të re — një mesazh, një video, një reagim në rrjetet sociale — dhe sa herë kontrollojmë telefonin, krijohet një cikël që përsëritet pa pushim.
Madje, shumë njerëz e kontrollojnë telefonin edhe kur ai nuk ka bërë asnjë tingull apo dridhje. Ky fenomen quhet “phantom vibration syndrome”, kur truri krijon ndjesinë sikur telefoni po bie, edhe pse nuk është e vërtetë.
Rrjetet sociale kanë ndikuar edhe më shumë në këtë sjellje, pasi platformat janë krijuar për të mbajtur vëmendjen tonë sa më gjatë. Video të shkurtra, njoftime të vazhdueshme dhe përmbajtje pa fund e bëjnë trurin të kërkojë vazhdimisht “edhe një herë”.
Psikologët paralajmërojnë se përdorimi i tepërt i telefonit mund të ndikojë te përqendrimi, gjumi dhe ankthi, sidomos tek të rinjtë. Dhe edhe pse shumica e pranojnë se kalojnë shumë kohë online, shumë pak arrijnë ta lënë telefonin larg për më shumë se disa minuta.