Shkencëtarët kanë identifikuar një mekanizëm përmes të cilit përbërësit e kafesë mund të ndihmojnë trupin kundër rënies që lidhet me moshën.
Kafeja mbron trupin nga plakja duke u lidhur me receptorin NR4A1, një proteinë e lidhur me rregullimin e stresit, inflamacionin dhe riparimin qelizor, sipas një studimi të ri.
Ndërsa kërkimet e mëparshme e kanë lidhur konsumimin e kafesë me jetë më të gjatë dhe rrezik më të ulët për sëmundje kronike, mënyra e saktë se si ndodhin këto përfitime ka qenë deri tani e paqartë, thekson studimi.
Studiuesit në Texas A&M College of Veterinary Medicine & Biomedical Sciences (VMBS) në SHBA zbuluan se përbërësit e kafesë lidhen me një receptor në trup të quajtur NR4A1, një proteinë e lidhur me plakjen, reagimin ndaj stresit dhe sëmundjet.
“Kafeja ka veti të njohura që promovojnë shëndetin,” tha Stephen Safe nga VMBS.
“Ajo që kemi treguar është se disa nga këto efekte mund të lidhen me mënyrën se si përbërësit e kafesë ndërveprojnë me këtë receptor, i cili ndihmon në mbrojtjen e trupit nga dëmtimet e shkaktuara nga stresi.”
NR4A1 është një receptor bërthamor që ndihmon në rregullimin e aktivitetit të gjeneve si përgjigje ndaj stresit dhe dëmtimeve në trup.
Studiuesit e përshkruajnë atë si një “sensor ushqyes”, një receptor që reagon ndaj përbërësve që gjenden në dietë dhe luan rol në ruajtjen e shëndetit ndërsa trupi plaket.
Proteina NR4A1 ndihmon në kontrollin e inflamacionit, niveleve të energjisë dhe riparimit të indeve, faktorë kyç për parandalimin e sëmundjeve si kanceri dhe rënia njohëse.
Në studim u zbulua se disa përbërës specifikë të kafesë, veçanërisht polifenolët dhe përbërësit polihidroksiluar, lidhen me këtë receptor dhe ndikojnë në aktivitetin e tij.
Ekipi gjithashtu gjeti se këta përbërës mund të ndikojnë në mbrojtjen ndaj sëmundjeve, duke reduktuar dëmtimet qelizore dhe duke ngadalësuar rritjen e qelizave kancerogjene.
Kur receptori NR4A1 u hoq nga qelizat, këto efekte mbrojtëse u zhdukën, duke forcuar rolin e tij në ndikimin e kafesë në organizëm.
“Nëse dëmtoni pothuajse çdo ind, NR4A1 reagon për ta reduktuar dëmin,” tha Safe. “Nëse e hiqni këtë receptor, dëmi bëhet më i madh.”
Megjithatë, studiuesit paralajmërojnë se përfitimet shëndetësore të kafesë nuk kufizohen vetëm në këtë mekanizëm.
“Ka ende shumë punë për t’u bërë,” tha Safe. “Ne kemi bërë lidhjen, por duhet të kuptojmë më mirë sa e rëndësishme është ajo.”
Mekanizmat pas efekteve të kafesë në shëndet po studiohen gjerësisht. Një studim i fundit tregoi se konsumimi i moderuar i kafesë me kafeinë lidhet me ulje të ankthit dhe përmirësim të përqendrimit dhe vigjilencës. Kafeina është lidhur gjithashtu me një rrezik më të ulët të inflamacionit.
Studimi zbuloi gjithashtu se edhe kafeja pa kafeinë përmirëson të nxënit dhe kujtesën, duke sugjeruar se përbërës të tjerë, si polifenolët, janë përgjegjës për këto përfitime njohëse.