Mbretëria e Bashkuar po përgatitet të bëhet vendi i parë në botë që ndalon në mënyrë të përhershme blerjen e duhanit për brezat e rinj.
Pas miratimit përfundimtar nga Dhoma e Komunave dhe Dhoma e Lordëve, projektligji “Tobacco and Vapes Bill” ka përfunduar procedurat parlamentare, duke shënuar atë që qeveria e ka cilësuar si një moment historik për shëndetin publik.
Ligji parashikon ndalimin absolut të shitjes së produkteve të duhanit për këdo që ka lindur pas 1 janarit të vitit 2009. Nuk bëhet fjalë për një rritje të përkohshme të moshës ligjore, por për një kufi që zhvendoset çdo vit, duke e bërë teknikisht të pamundur që këta të rinj të blejnë cigare në mënyrë të ligjshme gjatë gjithë jetës së tyre.
Kufizime të reja edhe për cigaret elektronike
Përveç masave ndaj duhanit tradicional, ligji i jep ministrave kompetenca të reja për të rregulluar tregun e cigareve elektronike dhe produkteve me nikotinë. Vëmendja do të përqendrohet veçanërisht te aromat dhe paketimi, me qëllim që këto produkte të bëhen më pak tërheqëse për të miturit, shkruan La Stampa.
Gjithashtu, përcaktohen zona “pa duhan”. Përdorimi i cigareve elektronike do të ndalohet në automjetet që transportojnë fëmijë, në parqe lojërash dhe në hapësirat e jashtme të shkollave dhe spitaleve.
Megjithatë, ligji mban një qasje pragmatike: pirja e duhanit dhe përdorimi i cigareve elektronike do të lejohet në banesat private dhe në ambientet e jashtme të pub-eve. Po ashtu, përdorimi i cigareve elektronike do të mbetet i lejuar jashtë spitaleve për të inkurajuar të rriturit të heqin dorë nga duhani tradicional.
Parandalimi si rruga kryesore për të shpëtuar jetë
Sekretari i Shtetit për Shëndetësinë, Wes Streeting, theksoi se parandalimi është e vetmja rrugë për të shpëtuar jetë dhe për të ulur presionin mbi Shërbimin Kombëtar Shëndetësor (NHS).
“Është një moment historik. Do të ndërtojmë një Britani më të shëndetshme”, deklaroi ai.
Në të njëjtën linjë, ministrja e Shëndetësisë, baronesha Merron, e cilësoi ligjin si “ndërhyrjen më të madhe të shëndetit publik të një brezi”.
Kritika nga sektori dhe përgjigjja e qeverisë
Pavarësisht mbështetjes së gjerë politike, nuk kanë munguar edhe kritikat. Lord Naseby, ish-deputet konservator, shprehu shqetësim për ndikimin tek shitësit dhe sugjeroi që prioritet duhet të jetë edukimi dhe jo ndalimi.
Megjithatë, ministrja e Shëndetësisë siguroi se qeveria britanike do të vijojë të bashkëpunojë ngushtë me bizneset për të menaxhuar tranzicionin drejt asaj që synohet të jetë brezi i parë pa duhan në historinë britanike.