Të rinjtë në Australi, përveçse që të miturit nuk mund të përdorin rrjetet sociale, tashmë duhet të vërtetojnë që janë mbi 18 vjeç përpara se të kenë akses në përmbajtje për të rritur.
Në këto përmbajtje bëhet fjalë për pornografi, videolojërat me vlerësim R dhe chatbot-et e inteligjencës artificiale që kanë përmbajtje seksuale eksplicite.
Ligji i ri parashikon që kompanitë duhet të ndërmarrin hapa kuptimplotë për të parandaluar që fëmijët të ekspozohen ndaj përmbajtjeve për të rritur. Nuk do të mjaftojë thjesht klikimi mbi dritaren ku shkruhet “Unë jam mbi 18 vjeç”, por mund të ketë përdorimin e “Face ID”, identifikimeve dixhitale apo edhe detaje të kartës së kreditit.
Julie Inman Grant, Komisionere për Sigurinë Elektronike e Australisë, është shprehur se nëse një i ri do të kërkojë në internet përmbajtje që e ekspozojnë atë në rrezik, rezultati do të jetë linja e ndihmës për rastin dhe jo rezultate se si të vetëlëndohet.
Një hulumtim i bërë nga agjencia e Grant zbuloi se një në tre fëmijë të moshës 10–17 vjeç kishin parë imazhe apo video me përmbajtje seksuale në internet, raporton BBC.
Por për ekspertët, edhe pse janë të kënaqur me hapat që po ndërmerren për mbrojtjen e fëmijëve, shprehen të shqetësuar për të rinjtë që arrijnë akses në përmbajtje të papërshtatshme në “cepat e errët” të internetit.
Rahat Masood, pedagoge për sigurinë kibernetike në Universitetin e Uellsit të Ri Jugor, është shprehur se ligjet e reja do të kenë ndikim të kufizuar.
“Shumica e të rinjve janë shumë të aftë në aspektin digjital, duke përdorur VPN ose mjete të tjera për të mashtruar faqet e internetit, duke i bërë të mendojnë se po hyjnë nga një vend tjetër. Përdorimi i kartës së kreditit ose dokumentit të identifikimit do të ishte një mënyrë mjaft e lehtë për të anashkaluar rregullat”, shprehet Masood.