Aktori İbrahim Yıldız, i cili u plagos rëndë pasi mbeti nën një pemë të rrëzuar në Stamboll në gusht të vitit të kaluar, ka humbur jetën pas një beteje 6-mujore për mbijetesë.
27-vjeçari İbrahim Yıldız u plagos rëndë më 15 gusht në Kartal të Stambollit, pasi një pemë u rrëzua si pasojë e erërave të forta. Ai po trajtohej prej muajsh në terapi intensive dhe tani ka ardhur lajmi i hidhur.
Yıldız, i cili kishte marrë pjesë në produksione si “Muhteşem Yüzyıl Kösem” dhe “Duy Beni”, po trajtohej prej 6 muajsh në njësinë e kujdesit intensiv në Spitalin e Trajnimit dhe Kërkimit të Universitetit Marmara në Pendik. Aktori i ri u nda nga jeta dje.
Lajmin për vdekjen e Yıldız e bëri të ditur kolegu i tij, aktori i njohur Caner Topçu, përmes një postimi në Instagram.
