Fenomeni i dhunës brenda familjes po sjell një shtrirje më të gjerë të personave të përfshirë në konflikte. Të dhënat zyrtare nga Policia e Shtetit tregojnë se mbi 4 mijë djem dhe burra kanë mbetur të dëmtuar në gjashtë vitet e fundit. Vetëm vitin që lamë pas në Shqipëri kanë mbetur të lënduar 877 meshkuj si pasojë e konflikteve brenda familjes.
Sipas sociologëve, kjo rritje e numrit të meshkujve të dëmtuar nga dhuna brenda familjes gjenerohet kryesisht nga çështje pronësore dhe përfshirja e personave të tjerë kur në familje ushtrohet dhunë.
“Kjo limfë e dhunës që rrjedh në familjen shqiptare, dhe që është bërë një patologji e dendur që ndeshet shpesh, ka filluar të prekë edhe meshkujt. Edhe ata nuk janë të imunizuar, sepse jo në të gjitha rastet tipologjia e dhunës shkaktohet mbi femrat; ka edhe raste të tjera që lidhen me meshkujt. Kemi familje numeroze, me shumë çifte brenda tyre, dhe raportet midis kunatave, midis vëllezërve sjellin probleme të karakterit pronësor apo karaktereve të tjera, që shndërrohen në dhunë, plagosje e deri në vrasje. Viktimizimi i dhunës brenda familjes tek burrat si shkak kryesor ka problemet pronësore”, tha sociologu Gezim Tusha.
Ajo që shihet me shqetësim nga sociologët është fakti se po përhapet dhuna mes meshkujve për shkaqe familjare.
“Në shoqërinë shqiptare, kjo dhunë mes meshkujve që janë në lidhje gjaku me njëri-tjetrin, që janë vëllezër, që janë kusherinj të parë, fis, është bërë e përhapur. Kjo përhapje e dhunës midis burrave për shkaqe familjare apo jashtë familjare është një fenomen që po vjen duke u zgjeruar”, shtoi ai.
Sociologët e vlerësojnë si pozitiv faktin e raportimit të dhunës edhe nga gjinia mashkullore, duke u shkëputur nga mendësia se burrat nuk duhet të ankohen për dhunën.