Monumenti Newborn në Prishtinë ka marrë një pamje tjetër këtë të martë, me rastin e 18-vjetorit të Pavarësisë së Kosovës.
Me mbishkrimin “Kosova e burgosur” sot aktivistët kanë vendosur 5 mijë emblema të UÇK-së, për të shprehur mbështetjen e tyre për ish-drejtuesit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi, të cilët po gjykohen në Hagë. Për ta Prokuroria Speciale ka kërkuar nga 45 vite burg për secilin.
Sjellim ndërmend se monumenti Newborn, i vendosur përballë Pallatit të Rinisë dhe Sporteve në Prishtinë u zbulua në ditën e shpalljes së Pavarësisë së Kosovës dhe për 18 vjet është kthyer në një ikonë të kryeqytetit. Pasi për pesë vite qëndroi me pamje të njëjtë, më pas është ringjyrosur çdo vit, duke marrë pamje të re për të përcjellë mesazhe të ndryshme që përshtaten me realitetin e Kosovës.
Ideatori i këtij monumenti, Fisnik Ismaili ndërsa ishte i ftuar në emisionin “Ora Shtatë” në Klan Kosova, tha se çdo vit e përjeton ndryshe këtë ikonë, pasi siç shprehet ai, ndonjëherë mërzitet, ndonjëherë pikëllohet e ndonjëherë edhe është i buzëqeshur.
Këtë vit, koncepti artistik është bazuar në artin tradicional japonez “Kintsugi”, teknikë që simbolizon “shërimin, forcimin dhe rritjen e vlerës pas sfidave dhe vështirësive”.