Një inovacion i ri mund të ndryshojë mënyrën se si trajtojmë mbetjet plastike nga pajisjet elektronike. Aquafade është një material plastik i tretshëm, i cili shpërbëhet plotësisht brenda gjashtë orëve kur vendoset në ujë, duke lehtësuar riciklimin dhe ripërdorimin e elementëve më të vlefshëm.
Ai mund të përdoret për të mbështjellë pajisjet elektronike si kompjuterët, tastierat dhe aksesorë të tjerë, dhe tretet kur pajisja nuk nevojitet më, duke zvogëluar ndjeshëm mbetjet elektronike.
“Ne zbuluam një material që është si ngjitës, quhet PVOH ose alkool polivinil. Një nga kriteret ishte që të ishte i sigurt si produkt ushqimor; nëse fëmijët e lëpijnë, ai duhet të jetë plotësisht i biodegradueshëm në sistemin e tubacioneve,” shpjegon Samuel Wangsaputra.
Sfida më e madhe ishte krijimi i një mbulese kundër ujit që mund të shpërbëhet, por gjithashtu të qëndrojë rezistente. Shtresa e mbështjelljes aplikohet vetëm në pjesën e jashtme të pajisjes dhe e bën atë kundër ujit deri në 5 metra për 30 minuta, duke e mbrojtur nga incidentet e përditshme apo moti i lagësht.
“Por nëse heq vetëm një vidë, kjo krijon rrjedhje. Më pas e fut në ujë. Pas 5-6 orësh, do të tretet dhe ajo që mbetet është ujë i bardhë dhe pjesët më të vlefshme të pajisjes elektronike,” shton Wangsaputra.
Uji i përdorur mund të derdhet thjesht në lavaman apo tualet, pasi materiali dekompozohet natyrshëm në sistemin e tubacioneve.
Zbatimi i parë komercial i Aquafade pritet të jetë mbështjellësit e shiritave me LED që përdoren në koncerte, duke kombinuar sigurinë dhe riciklimin. Momentalisht, Aquafade kushton dyfishin e plastikës tradicionale, por kjo kosto shtohet vetëm 5-10% në produktin final, dhe prodhimi në masë pritet të ulë ndjeshëm çmimin.
Ky material mund të shënojë një hap të madh drejt një bote më të pastër, duke ofruar një alternativë praktike dhe ekologjike ndaj mbetjeve elektronike.