E ftuar në episodin e parë të emisionit të ri “Late Night N’Bllok” me Drini Zeqon, gazetarja Klodiana Lala ka folur hapur për sulmin e armatosur ndaj banesës së prindërve të saj, një nga ngjarjet më të rënda dhe tronditëse që ka përjetuar në jetën e saj.
Lala tregoi se ditën kur ndodhi atentati, ajo nuk ndodhej në shtëpi, por aty ishin dy vajzat e saj, prindërit dhe vëllai, si edhe dy miq të familjes.
“Unë isha larguar pak më herët sepse kishte shumë njerëz në shtëpi. Një person i armatosur me kallashnikov erdhi dhe qëlloi drejt fasadës së banesës së prindërve të mi. Sigurisht, është ngjarja më tronditëse e jetës sime,” – u shpreh ajo.
Gazetarja theksoi se beson se sulmi është kryer për shkak të profesionit të saj:
“Jam e bindur që kjo ka ndodhur për shkak të punës sime. Familja ime nuk ka probleme të asnjë natyre.”
Ajo shtoi se pas ngjarjes ka dëgjuar teori konspirative dhe përpjekje për të baltosur, të cilat, sipas saj, synojnë t’i mbyllin gojën:
“Kam dëgjuar lloj-lloj spekulimesh, përpjekje për të hedhur baltë dhe për të më intimiduar. Dyshimet e mia i kam paraqitur në Prokurori, por ende nuk ka një autor të identifikuar.”
E pyetur nga Drini Zeqo nëse ajo e di kush mund të jetë përgjegjës, Lala u shpreh:
“Unë mendoj se e di dhe këtë e kam bërë të ditur tek autoritetet. Ata e kanë të qartë dhe nuk besoj se mund të jem unë personi qe ti interferojë por e kanë të qartë autoritet.”
Ajo shtoi se më shumë se sulmi në vetvete, e ka lënduar qëndrimi i disa personave që ajo i ka çmuar dikur:
“Më ka shqetësuar fakti që shumë njerëz që i kam vlerësuar janë përpjekur të hedhin baltë mbi këtë çështje.”
Klodiana Lala pohoi se pavarësisht tronditjes së madhe, ajo do të vazhdojë punën e saj pa u trembur, ndërsa çështja mbetet ende në hetim.